മണ്ണിലേക്ക് കുത്തിവീഴുന്ന മഴയുടെ താളം രസിച്ച്, തുലാവര്‍ഷം നല്‍കിയ ആദ്യ മഴയില്‍ ഓടിക്കളിച്ച ആ നേരം എനിക്കിന്നോര്‍മ്മയുണ്ട്
വള്ളിനിക്കറും ബനിയനും ഇട്ട് - മനസ്സിനുള്ളില്‍ ഒരായിരം ചിരിയുമായി
തകര്‍ത്തു പെയ്യുന്ന മഴയില്‍ ആടിപ്പാടിയ ആ നേരം എനിക്കിന്നോര്‍മ്മയുണ്ട്
മഴത്തുള്ളികള്‍ കൈപ്പത്തികള്‍ കൊണ്ട് തട്ടിത്തെറിപ്പിക്കും വേളയില്‍
ഒരു അലറുന്ന മേഘത്തിന്‍ കൂടെ അലറിയ ആ നേരം എനിക്കിന്നോര്‍മ്മയുണ്ട്
അലറി മടുത്ത മേഘം വീണ്ടും ആഞ്ഞൊന്നലറിയപ്പോള്‍
ഓടിച്ചെന്നു അമ്മയുടെ മടിയില്‍ ഇരുന്ന ആ നേരം എനിക്കിന്നോര്‍മ്മയുണ്ട്
അറഞ്ഞു പെയ്ത മഴയുടെ കൂടെ വീശിയ കാറ്റില്‍, ദൂരെ എവിടെയോ
ഒരു കുയില്‍ - ഭയന്ന് കൂവിയ ആ നേരം എനിക്കിന്നോര്‍മ്മയുണ്ട്
തുള്ളികള്‍ പെയ്തു നിറഞ്ഞ ഒരു തൊടിയില്‍,
കടലാസു തോണികള്‍ ഒഴുക്കിക്കളിച്ച ആ നേരം എനിക്കിന്നോര്‍മ്മയുണ്ട്
മേഘം മാറി മാനം തെളിഞ്ഞു - തൊടിയിലെ വെള്ളം വറ്റിമറഞ്ഞപ്പോള്‍
മുഖം വാടി ആകാശത്തേക്ക് നോക്കി നിന്ന ആ നേരം എനിക്കിന്നോര്‍മ്മയുണ്ട്
വീണ്ടും ഒരു മഴയുടെ താളം രസിച്ച്, അതില്‍ ഓടിക്കളിക്കാനും ആടിപ്പടാനും
തോണികള്‍ ഒഴുക്കാനും കാത്തിരുന്ന ആ നേരം എനിക്കിന്നോര്‍മ്മയുണ്ട്.
