എന്തറിയാം?

image credit : ottamazha

തകര്‍ന്നു കാണും ആ കാറ്റില്‍ എവിടെയോ ഒരു കുടില്‍-
എങ്ങനെ ഉണ്ടായി ആ കുടില്‍ എന്ന് കാറ്റിനെന്തറിയാം
കത്തുന്നുണ്ടാവും ആ നെഞ്ചില്‍ ഇപ്പോളും കനലുകള്‍ -
എത്ര എരിഞ്ഞിട്ടുണ്ടാവും ആ ഉള്ളം എന്ന് മഴക്കെന്തറിയാം

കാറ്റില്‍ പറത്തിയ ജീവിതം

ആരുടെയോ വിരല്‍ തുമ്പിലാണിന്നു ജീവിതം
ആരുടെയോ നേരംപോക്കിനാണീ ഓട്ടം
തിരിച്ചും മറിച്ചും ഉയരങ്ങളിലേക്ക് എന്നെ തള്ളി വിടുമ്പോള്‍
ഭയമാണ് എനിക്ക് എന്ന് നിങ്ങള്‍ക്കറിയില്ലേ ?

ഓരോ വലിയിലും ചങ്ക് പിടക്കാറുണ്ട് - എന്നാലും
ആരുടെയോ സന്തോഷങ്ങള്‍ക്കായി നീങ്ങാറുണ്ട് ഞാന്‍
കുരുത്തക്കേടുകള്‍ കാട്ടാറില്ല ഞാനീ ഉയരങ്ങളില്‍
എങ്ങാനം വിട്ടു പോയാലോ ആ ചരട് എന്ന ഭയമാണ്‌

ഉയരങ്ങളില്‍ ഇങ്ങനെ ഭയന്നിരിക്കുന്ന എന്നെ
ഒരു ദയയും കാട്ടാതെ വന്നു തള്ളാറുണ്ട് ഒരു കാറ്റ്
ഒരു ദാക്ഷിണ്യവും കൂടാതെ പൊള്ളിക്കാറുണ്ട് ഒരു വെയില്‍
എന്നാലും പിടിച്ചു നില്‍ക്കാറുണ്ട് ഞാന്‍ -
എങ്ങാനം വിട്ടു പോയാലോ ആ ചരട് എന്ന ഭയമാണ്‌

ഉയരങ്ങളിലേക്കുള്ള പാച്ചിലില്‍ കാണാറുണ്ട് ഞാന്‍
എന്നെ പോലെ മറ്റു ചിലരെ
തമ്മില്‍ നോക്കി ഒന്ന് ചിരിക്കും മുമ്പേ തന്നെ ഞങ്ങളെ
ശത്രുക്കളാക്കും ചില വിരല്‍ തുമ്പുകള്‍
കാട്ടാറില്ല തിരിഞ്ഞു ഞാന്‍ ഒരു പരിഭവവും
എങ്ങാനം വിട്ടു പോയാലോ ആ ചരട് എന്ന ഭയമാണ്‌

ആരോരുമില്ലാതെ ഒറ്റയ്ക്ക് പാറുമ്പോള്‍ ചിലപ്പോള്‍
ഞാനൊന്ന് താഴേക്കു നോക്കും
ദയയും ദാക്ഷിണ്യവും ഇല്ലാത്ത ഒരു ലോകമാണ്
ഞാന്‍ കാണുന്നത്
വാശിയും ദേഷ്യവും നിറഞ്ഞ കുറെ മനുഷ്യരെയാണ്
ഞാന്‍ കാണുന്നത്
ഉയരങ്ങളില്‍ നിന്ന് ഞാന്‍ വെറുതെ ചിന്തിക്കും
ആ ചരടുകള്‍ സ്വയം പൊട്ടിച്ചു ഏതെങ്കിലും മരത്തിന്‍
ചില്ലകളിലേക്ക്‌ ഇടിച്ചിറങ്ങി നെഞ്ച് കീറി മുറിച്ചാലോ എന്ന്

ഇങ്ങനെ ഒരു ലോകത്ത് തിരികെ വന്നിട്ടെന്തിനാ ?

ഭാഗ്യവാനാണാമേഘം

ഈ ആകാശത്തിന് താഴെ നീയും ഞാനും
ഒരു നോക്ക് കാണാന്‍ കൊതിക്കാറുണ്ടെന്നും
ഭാഗ്യവാനാണാമേഘം - അവനു
പെയ്തു മരിക്കാന്‍ ഒരു ഭൂമിയുണ്ടെന്നും.

വെറും ഓര്‍മ്മകള്‍

കണ്ടതും കേട്ടതും
വന്നതും പോയതും
ഇണങ്ങിയതും പിണങ്ങിയതും
പാടിയതും ആടിയതും
ഇടറിയതും പതറിയതും
വാര്‍ന്നതും തോര്‍ന്നതും
തേടിയതും നേടിയതും -
ഇന്ന് വെറും ഓര്‍മ്മകള്‍