തളരുമ്പോള്‍,
നിലത്തിരിക്കുന്ന അമ്മയുടെ
മടിയില്‍ തലചായ്ച്ചുറങ്ങുന്ന
ഒരു കാലമുണ്ടായിരുന്നു,
മേത്തയില്ല, തലയണയില്ല
വിരിക്കാന്‍ ഒരു പായും
പുതക്കാന്‍ അച്ഛന്‍റെ കൈകളും -
വിശന്നപ്പോള്‍,
സ്നേഹത്തോടെ ഉരുട്ടി
വായിലേക്ക് വച്ചുതന്ന
ഒരുരുള ചോറ് കൊണ്ട്
നിറഞ്ഞു, വയറും മനസ്സും.
ആ കുട്ടി വളര്‍ന്നു വലുതായി,
പഠിച്ചവന്‍ എഞ്ചിനീയറായി,
ജീവിതത്തിന്‍റെ മാരത്തോണ്‍
മത്സരത്തില്‍, അവനുമിന്നൊരു
സ്ഥാനാര്‍ഥി ആയി.
ലക്ഷങ്ങള്‍വാരുന്ന തിരക്കിലാണ്,
അമ്മയോടോന്നു മിണ്ടിയിട്ടിന്നു
രണ്ടാഴ്ചക്കു മേലെയായി,
അച്ചനസുഖം കുറവുണ്ടോന്നറിയില്ല,
എന്തായാലും അയക്കും ഈ മാസവും,
മുടങ്ങാതെ ഒരു മുപ്പതിനായിരം.
കമ്പനിയില്‍ ഹൈ-പോസ്റ്റാണ്,
അതിനൊത്ത സാലറിയുമുണ്ട്.
ടൂ ബെഡ്രൂം അക്കോമടേഷനും,
ടൊയോട്ടാ കാമറി വണ്ടിയുമുണ്ട്.
ആടോമാടിക് വാഷിംഗ്‌ മെഷീനും,
46 ഇഞ്ച്‌ എല്‍.ഇ.ടി ടീവിയും,
ലേറ്റസ്റ്റ് ആപ്പിള്‍ ഫോണുമുണ്ട്.
എന്നിട്ടും, ഇനിയും വേണം ലക്ഷങ്ങള്‍.
കൊച്ചിയിലൊരു ഫ്ലാറ്റ് വാങ്ങണം
ഒത്താല്‍ ഒരു വില്ല ബംഗ്ലൂരും,
വൈഫ്‌നു ആലുക്കാസ് ഗോള്‍ഡും,
മകന് എം ബി ബി എസ് അഡ്മിഷനും,
മകള്‍ക്ക് യു എസ് വരനെ നോക്കണം,
സ്ത്രീധനമായൊരു ബെന്‍സും.
വീക്കെണ്ടുകളില്‍ ഷോപ്പിംഗ്‌ ഉണ്ട്,
ചിലപ്പോളൊക്കെ പാര്‍ട്ടികളും.
മുന്തിയ ഇനം വിസ്ക്കികളുണ്ട്,
കഴിക്കാന്‍ കെണ്ടുക്കി ഫ്രൈയ്യുമുണ്ട്.
പൊങ്ങച്ചത്തിനു പെപ്പെ ജീന്‍സും,
അടിടാസിന്‍റെ കൂടിയ ഷൂവുമുണ്ട്.
നാലാളറിയണം, നാടെല്ലാം പറക്കണം,
ഉണ്ടും ഉടുത്തും കുടിച്ചും കൂത്താടാന്‍,
ഇനിയും വേണം ലക്ഷങ്ങള്‍
തളരുന്നുണ്ടീ ഓട്ടത്തില്‍,
എ.സി.യുടെ കാറ്റടിച്ചു തണുത്ത
കിംഗ്‌ സൈസ് മെത്തയുണ്ട്,
ഓര്‍ത്തോപ്പെടിക്ക് തലയണയുണ്ട്,
പുതക്കാന്‍ കോസ്റ്റലി പുതപ്പുണ്ട്,
എണ്ണയും കൊഴുപ്പും കയറ്റി
നിറച്ചൊരു പള്ളയുമുണ്ട്,
ഉറക്കം വരാറില്ല...
ഇനിയും വേണം ലക്ഷങ്ങള്‍..!!
